Wohi Gardishein Wohi Paich-o-Kham Tere Baad Bhi

Wohi Hosle Mere Dum-Ba-Dum Tere Baad Bhi



Tere Saath Bhi Teri Har Jafa Mujhe Mo'atbar

Tere Sare Gham Mujhe Mohtaram Tere Baad Bhi



Tere Gham Se Hai Meri Har Khushi Mein Waqaar Sa

Mere Haal Pe Hein Tere Karam Tere Baad Bhi



Barre Muztarib Mere Raaste Tere Bagheir

Barre Pur-Sukoon Mere Qadam Tere Baad Bhi



Teri Saath Thi Meri Har Khushi Teri Muntazir

Teri Muntazir Meri Chashm-e-Nam Tere Baad Bhi



Tere Saath Thi Meri Dastaras Mein Jo Roshni

Faqat Aik Pal Kabhi Subha-e-Dum Tere Baad Bhi



Tujhe Jaan-e-Gham Jo Kaha Kabhi To Ghalat Kaha

Meri Zindagi Ke Jawa'n Hein Gham Tere Baad Bhi



Tujhe Paas-e-Ehd-e-Wafa Raha Mere Saath Kab

Mujhe Jaa'n Se Barrh Ke Tera Bharam Tere Baad Bhi



Mere Baad Kitne Hi Roop Tune Badal Liye

Main Wohi Hoon Ab Bhi Teri Qasam Tere Baad Bhi



Tu Kisi Ke Qalb-e-Aarzu Mein To Dhal Gaya

Main Na Ho Saka Kabhi Khud Mein Zam Tere Baad Bhi



Teri Aahato Ka Gudaaz Tha Mera Humsafar

Yehi Ik Guma'n Mera Hum-Qadam Tere Baad Bhi



Tu Chala Gaya Sabhi Qehqaho Ko Sameit Kar

Mere Paas Hai Mera Zarf-e-Gham Tere Baad Bhi